Solarisek, CAF Taldeko enpresak, Transdev eta Arriva operadoreei 96 eta 30 autobus elektriko emango dizkie, hurrenez hurren, Herbehereetako errepide eta hirietara joango direnak. Bi kontratuen zenbateko osoa 90 milioi euro ingurukoa da.

Horrela, Transdev Nederland Holding operadoreak, Herbehereetako garraio operadore handienetako batek, 96 autobus elektriko entregatzeko eskaera bat esleitu dio Solaris enpresari. Autobus horiek Urbino gamako lau ibilgailu modelori dagozkie, eta luzera desberdinak dituzte ibilbidearen beharraren arabera.

Solarisek Transdev enpresari emango dion zero isuriko ibilgailuen flota berriak Utrecht probintzian emango du zerbitzua, herrialdearen erdialdean, eta 2025eko azken hiruhilekoan entregatzea aurreikusten da.

Datorren urtearen amaieran hasiko da Utrechteko Exekutiboak Transdev enpresari hamar urterako esleitu dion emakida, Utrecht hiriko eta inguruetako garraio publikoaren kudeaketa barne hartzen duena, 50 autobus lineekin eta hiriko tranbia sareko hiru lineekin, azken urteotan CAFek hornitutako 50 tranbia baino gehiagori zerbitzua emateko.

Ez da Solarisen lehen proiektua Transdev Nederlandekin, enpresak Connexxion izeneko bere filial bati Hego Holandan duela hiru urtetik martxan dauden hidrogenozko 20 autobuseko flota bat eman baitzion.

Solarisek 30 autobus elektriko egingo ditu Arriva operadorearentzat, 12 metroko 26 Urbino eta 18 metroko lau autobus artikulatu Mendebaldeko Brabante eskualdean, 2025etik aurrera. Inbertsio hori operadorearen planaren parte da, eskualdeko autobus flota osoa zero isurikoa bihurtzeko, datorren urtearen erdian emakida berria hasi aurretik.

Oraingo honetan, ibilgailuak «motorraren dorrea deiturikoa ezabatzen duen propultsio sistema modularreko arkitektura berri batean» oinarritzen dira. Diseinu horri esker, bidaiariarentzako espazioa handitu daiteke, eta bateriak sabaian bakarri jar daitezke.

12 metroko eta 18 metroko ibilgailuek 400 kWh inguruko edukiera duten bateriak izango dituzte, eta entxufe baten bidez kargatuko dira. Operadoreak segurtasun sistema modernoenak aukeratu ditu; horien artean, monitorizazio integraleko sistema nabarmentzen da, ibilgailuaren aurrealdean eta eskuinaldean Fisheye kamerak eta alboko ispilu tradizionalen ordez kamerak dituena.

Nazioarteko saria

Halaber, Hannoverren IAA Transportation azoka inauguratzeko ekitaldian, Bus of the Year lehiaketako nazioarteko epaimahaiak ‘2025. urteko autobusa’ titulua eman zion hidrogenozko Solaris Urbino 18 modeloari.

Solaris ibilgailu batek titulu hau lortu duen bigarren aldia da lehiaketaren historian, 2017an Solaris Urbino 12 modeloak jaso baitzuen sari hori.

CAFek nabarmendu duenez, bi kasuetan «agerian geratu da Solarisek berrikuntzaren alde egindako apustu sendoa, bateriaz propultsatutako autobus batekin eta hidrogenozko ibilgailu batekin titulua lortu duen lehen fabrikatzailea izan baita lehiaketaren historian».